Explanation

The meaning in a few plain lines

Mwene Omari (Imana Allah Ibishimire bompi) yavuze ko Umuvugishwamana (nyakugira amahoro n'impuhwe z'Imana Allah) yamufashe ku bitugu aca amubwira ati: Uraba kw'isi nk'aho woba uri umushitsi aje mu gihugu ata muhana agifisemwo akikamwo umusaya, ata muteramyi afise amuremesha, ata n'umuryango canke imigenderanire mu kibano ahafise, bituma ataronka umwanya wo kwitwararika ibikorwa vy'Imana Rurema Allah, ahubwo mbere urarenza aho, uheze ube nk'ingenzi iri ku rugendo mu nzira iyishikana ku gatumba mu gihugu cayo; kuko burya umushitsi hari igihe bishika agahitamwo kuba mu kindi gihugu, bitandukanye n'ingenzi iri ku rugendo ruyiganisha mu gihugu cayo, uyu araheza akitwararika kutiremereza no kudahagarara ahadakenewe arajwe ishinga n'ugushika mu gihugu ciwe. Kurya rero uwuri ku rugendo adakenera kwitwaza ibimuremera birengeye impamba n'induhuro bimushikana iyo aroye, ni nk'uko nyene n'umwemeramana abigenza mu buzima bwo kw'isi, ntakenera vyinshi birenze ku vyomushikana iyo aroye (mu buzima bw'inyuma yo gupfa). Iyi mpanuro rero, Mwene Omari yarayigendeye aho yahora avuga ati: Niwaramuka ugeze mu gitondo, ntukarindirize ico ushaka gukora gushika ku mugoroba; niwirirwa naho ukabona ugeze ku mugoroba, ntukarindirize ico ushaka gukora gushika mu gitondo, maze rero wiharure mu bapfuye bari mu mva; kuko mu buzima uwutagize amagara meza ntabura kurwara; mu gihe ugifise amagara meza rero, ba uhurumbira ibikorwa vy'iyumviramana bizogufasha igihe wakitswe n'amagara ukarwara, maze witwararike gukoresha umwanya wawe mu gukora ibikorwa vyiza bitegetswe imbere yuko indwara iguciramwo, ukoreshe n'ubuzima bwawe bwo kw'isi mu kugwiza umwimbu w'ibizogufasha mu nyuma y'urupfu rwawe.